就係差果少少

2009/6/2 上午 11:44:39

以前有个後生仔, 畢業後就加入海上鑽油隊, 响返工嘅第一日, 佢嘅阿頭就要呢位年輕人喺指定時間內爬上幾十米高嘅鑽井架, 將一个包好嘅盒, 送去最頂層嘅主管手上。

後生仔爬到上氣唔接下氣, 成頭大汗終於上到頂, 交个盒比主管, 主管只係响上面畫隻龜, 就叫佢送返落去交比阿頭, 佢又雞咁腳跑落去, 阿頭又喺个盒上簽个名比佢送返比主管,

當佢第二次爬上去頂層果時, 陰公, 攰到腳都震埋, 得返半條人命, 點知个主管同上次一樣, 又係响个盒度簽个名就叫嗰年輕人送返比阿頭, 佢擦乾Ｄ汗, 又腳軟軟咁冲返落去,

落到去阿頭又一次叫佢再爬上去攞簽名, 第三次喇! 第三次喇! 个後生仔出盡力咁忍, 忍住唔好發脾氣, 又的起个盒, 千辛萬苦咁爬返上去, 爬到主管面前, 真係出汗出到成身濕晒, 主管一攞起个盒, 就冷冷閒咁叫佢打開个盒,

嗰年輕人一打開見係Ｄ咖啡呀、玻璃杯呀、糖呀, 即刻興到飛起, 主管再叫佢將Ｄ咖啡冲好, 佢就點忍都忍唔住, 劈炮唔撈了, 个後生仔發洩完, 終於舒服晒,

不過, 原來海上作業, 係對耐性同忍耐力有好高要求, 呢个只係入職training , 主管只可以講句 “前面3次嘅考驗都通過, 只係差最後呢少少, 就飲唔到自己沖嘅甜咖啡。

正所謂能忍天下之不能忍, 能苦天下之不能苦, 就能為天下之不能為。

耐性同忍耐力可以話係投資嘅致勝關鍵, 每當睇住自己所持嘅股票一直插水, 相信好多投資者都會心如刀割, 為左將Ｄ血汗錢保得幾多就幾多, 通常散户就响低位引刀一割, 斬之而後快, 完全忘記當初買入隻股票嘅原因, 結果次次都好似撞鬼咁, 一放就開始升………….. 有份捱但冇份享福, 大賺同大蝕就係差果少少。

投資日記 - 火燎森
URL: http://www.881903.com/blog/front/blogdetail.aspx?postid=1136&blogid=31